1 Samuel 23
UDavida uhlenga iKheyila
1Kwathi uDavida esetsheliwe ukuthi, “Khangela, amaFilisti ahlasela iKheyila njalo aphanga leziza,” 2wabuza uJehova, esithi, “Ngingahamba ukuyahlasela amaFilisti la na?” UJehova wamphendula wathi, “Hamba uyehlasela amaFilisti uhlenge iKheyila.” 3Kodwa abantu bakaDavida bathi kuye, “Lapha koJuda thina siyesaba. Pho kuzakuba kukhulu kangakanani uma sizakuyamelana lamabutho amaFilisti eKheyila!” 4UDavida waphinda wambuza futhi uJehova, njalo uJehova wamphendula wathi, “Hamba eKheyila, ngoba amaFilisti ngizawanikela ezandleni zakho.” 5Ngakho uDavida labantu bakhe baya eKheyila, walwa lamaFilisti wathumba izifuyo zawo. Wabulala amaFilisti amanengi kakhulu wahlenga abantu baseKheyila. 6(U-Abhiyathari indodana ka-Ahimeleki wayeze lesambatho semahlombe ekubalekeleni kwakhe kuDavida eKheyila.)USawuli uxotshana loDavida
7USawuli watshelwa ukuthi uDavida wayeseye eKheyila, ngakho wathi, “UNkulunkulu usemnikele kimi, ngoba uDavida usezifake entolongweni ngokungena edolobheni elilamasango lemigoqo.” 8USawuli wamemela amabutho akhe wonke empini ukuba aye eKheyila ukuyavimbezela uDavida labantu bakhe. 9Kwathi uDavida esizwa ukuthi uSawuli wayeceba okubi ngaye, wathi ku-Abhiyathari umphristi, “Letha isambatho samahlombe.” 10UDavida wasesithi, “Awu Jehova, Nkulunkulu ka-Israyeli, inceku yakho isizwile impela ukuthi uSawuli uceba ukuza eKheyila achithe idolobho ngenxa yami. 11Abantu baseKheyila banganginikela kuye na? USawuli uzakuza na njengalokhu inceku yakho ekuzwileyo? Awu Jehova Nkulunkulu ka-Israyeli, itshele inceku yakho.” UJehova wathi, “Uzakuza.” 12UDavida wabuza njalo wathi, “Abantu baseKheyila bazanginikela labantu bami kuSawuli na?” UJehova wathi, “Bazakunikela.” 13Ngakho uDavida labantu bakhe, ababengaba ngamakhulu ayisithupha ubunengi babo, basuka eKheyila baqhubeka behamba besuka kwenye indawo baye kwenye. USawuli esezwile ukuthi uDavida wayesebalekile eKheyila kasayanga khona. 14UDavida wahlala ezinqabeni zasenkangala lasezintabeni zeNkangala yaseZifi. Nsuku zonke uSawuli wamdinga, kodwa uNkulunkulu kamnikelanga uDavida ezandleni zakhe. 15Kwathi uDavida eseHoreshi eNkangala yaseZifi, wezwa ukuthi uSawuli wayephumele ukuyambulala. 16Njalo indodana kaSawuli uJonathani waya kuDavida eHoreshi wamsiza ukuba athole amandla kuNkulunkulu. 17Wathi kuye, “Ungesabi. Ubaba uSawuli kasoze abeke isandla phezu kwakho. Wena uzakuba yinkosi yako-Israyeli, njalo mina ngizakuba ngumsekeli wakho. Lobaba uSawuli uyakwazi lokhu.” 18Bobabili benza isivumelwano phambi kukaJehova. Emva kwalokho uJonathani waya ekhaya, kodwa uDavida wasala eHoreshi. 19Abantu baseZifi baya kuSawuli eGibheya bathi kuye, “Kanti uDavida kacatshanga phakathi kwethu ezinqabeni eHoreshi, entabeni yaseHakhila, eningizimu kweJeshimoni na? 20Khathesi, awu Nkosi, woza nxa kukuthokozisa ukwenza njalo, thina sizakuba yithi esizamnikela enkosini.” 21USawuli waphendula wathi, “UJehova alibusise ngokungikhathalela kwenu. 22Hambani liyekwenza amanye amalungiselelo. Dingani ukwazi lapho uDavida ajwayele ukuya khona lokuthi ngubani owambonayo khonapho. Bangitshela ukuthi uliqili kakhulu. 23Funani ukwazi ngazo zonke izindawo zokucatsha azisebenzisayo beselibuya kimi lilombiko oqinisekileyo. Emva kwalokho ngizahamba lani; nxa ekhona esigabeni, ngizamdinga phakathi kwezizwana zonke zakoJuda.” 24Ngakho-ke basuka baya eZifi besandulela uSawuli. Ngalesosikhathi uDavida labantu bakhe babeseNkangala yase-Mawoni, e-Arabha eningizimu kweJeshimoni. 25USawuli labantu bakhe baqalisa ukudinga, njalo kwathi uDavida esetsheliwe ngakho wehlela edwaleni wahlala eNkangala yaseMawoni. Kwathi uSawuli esekuzwile lokhu, waya eNkangala yaseMawoni elandela uDavida. 26USawuli wayehamba ngakwelinye icele lentaba, uDavida labantu bakhe bengakwelinye icele bephangisa ukuba babalekele uSawuli. Kwathi uSawuli lamabutho akhe sebezamfica uDavida labantu bakhe ukuba babathumbe, 27kwafika isithunywa kuSawuli, sisithi, “Woza ngokuphangisa! AmaFilisti ahlasela ilizwe.” 28Lapho-ke uSawuli wayekela ukulandela uDavida wasesiyakulwa lamaFilisti. Yikho nje indawo le beyibiza ngokuthi Sela Hamalekhothi. 29UDavida wahamba esuka lapho wayahlala ezinqabeni zase-Eni Gedi.
Copyright information for
NdeIBE